Media Vizion

Media Vizion i filloi transmetimet televizive përmes Vizion Plus në fillim të viteve 2000, u pajis me licesë kombëtare në vitin 2008 dhe në vitin 2016 mori nga AMA, një prej 5 licensave kombëtare për transmetimet numerike.

Kompania është pjesë e Concord Investment Group, një bashkim i disa kompanive në fusha të ndryshme si ndërtimi, infrastruktura portuale, media, telekommunikacion, tregtia, restorantet, botimet e të tjera, në pronësi apo nën kontrollin e familjes Dulaku.

Grupi përfshin ndër të tjera edhe kompaninë Media Vizion e cila është një nga kompanitë më të rëndësishme mediatike në Shqipëri. Kompania zotëron televizionin privat kombëtar Vizion Plus.

Concord Investment Group nuk është regjistruar si i tillë ligjërisht, por vetëdeklarohet në faqen online si bashkimi i një grup kompanish të zotëruara prej familjes Dulaku. Më herët të njëjtin status e kishte kompania Edil Al It, po ashtu në pronësi të familjes Dulaku. Concord Investment zotërohet në pjesë të barabarta nga vëllezërit Dulaku, të cilët përmes saj zotërojnë një sërë kompanish të tjera.

Tre vëllezërit Dulaku (Adrian, Artan, Genci), bashkëshorteve të tyre (Ridvana, Holta, Melina) kanë kontroll përmes aksioneve apo edhe këshillave mbikqyrës edhe mbi kompani të tjera që identifikohen në faqet zyrtare të Concord Investment, Edil Al dhe Tring TV, si pjesë e të njëjtit grup.

Ky grup siç identifikohet në faqen zyrtare të kompanisë, përfshin platformën e transmetimeve digitale dhe satelitore Tring TV, Albanian Satellite Comunication, Botimet Living, revistën Living, kompaninë e ndërtimit Edil Al, kompaninë e investimeve INER, kompaninë e prodhimit të betonit Alb Beton, kompaninë e tregtimit të makinave Albanian Motor Company, qendrat tregtare: Galeria, Cristal dhe Concord dhe po ashtu kompani të tjera.

Në faqen e interneti në portofolin e kompanisë Concord, përfshihen fshatrat turistikë në zhvillim të pagëzuar si San Pietro dhe San Nicolas dhe po ashtu projektet portuale Saranda Bay Marina, Marina Orikum dhe projekte të ngjashme.

Vitet e fundit grupi u zgjerua në aktivitetin e infrastrukturës portuale dhe ndërtimin e fshatrave turistikë. Kompanitë e zotëruara nga vëllezërit kanë fituar sëfundmi të drejtën e koncensionit të Portin e Limionit në Sarandë në korrik 2020 në ortakëri me Kastrati Group. Kanë marrë me qira simbolike prona publike në bregdet dhe u është dhënë statusi i investitorit strategjik.

Kjo marrëdhënie është pasuar me akuza për njëanshmëri të medias që ata zotërojnë në favor të qeverisë aktuale. Akuza që ata i kanë mohuar.

Ndërkohë pas një kallëzimi në Strukturën e Posaçme Anti Korrupsion, SPAK, nga ish-Zv.Komandanti i Forcës Detare Artur Meçollari, pjesë të pronës së marrë me qira nga kompania Concord Investment dhe Kastrati Group, që ishin më herët nën zotërimin e Forcave të Armatosura, u vunë nën sekuestro.

Në vitin 2016 ata u akuzuan se censuruan një emision kritik mbi trajtimin e mbetjeve të kryeqytetit, në të cilin kryebashkiaku akuzohej për abuzime. Ata i kanë mohuar akuzat.